إلى مدير اعمالى.

مش عارفة الفئة العمرية اللى احنا فيها دى هى السبب فى حزننا ولا الزمن اللى مبقاش فيه حاجة تفرح؟ ولا احنا نفسنا اللى بنركز زياده؟

مش عارفة هل ده فرق شخصيات؟ ولا فرق فى سياسة الاسرة نفسها و هى بتربى ولادها؟ ولا فى ايه بالظبط؟

انا كل اللى متأكده منه ان البنى آدم مجاش الدنيا عشان يزعل و لو حصل و زعل لازم يكون الزعل دا مؤقت.. انت ماتستاهلش تنام زعلان ماتستاهلش تضيع وقت فى الزعل صدقنى..

احنا مبنحسش بالسعاده قد ما بنحس بالزعل، عمرك شفت حد زهقان من كتر الفرح؟ حد عمره قالك انا نفسى اكتئب؟ او مثلاً انا نفسى ربنا يبتلينى ب مصيبة و ادخل السجن اقعدلى 10 سنين كده؟ او حد من اللى بحبهم يموت و افضل اعيط عليه؟ او امى يجلها مرض و تقعد ف السرير ما تقومش منه؟ لأ، مفيش.

محدش حاطط الزعل فى الwishlist بتاعته.

 ممكن يكون عشان الطبيعى إن البنى آدم يعيش سعيد؟ و إن الزعل هو اللى حاجة غريبة علينا؟ مش لاقية تفسير فيه امل اكتر من ده.

الزعل مؤقت و منتهى.. الطبيعى بتاع الدنيا انها سعيده.

ماتطاولش فى الزعل علشان الانبساط حلو بس مش  هيبقى حلو اما يفوتك.