Bunch of colors

اما يشتكولك.. اسمعهم متعرِضش مشكلتك لحد اصلاً جى يستنجد بيك الناس مش ناقصة هم على همها هو جه يشتكى عشان تعبان مش عشان تتعبه زياده بلاش غشومية يا جماعة سيبوهم يتكلموا و يطلّعوا كل اللى جواهم ادولهم فرصتهم زى ما بيقولوا طوِّل بالك.. خليك مرايتهم، طبطب عليهم اوعى فى يوم تتفه من مشاكلهم مش انت اللى تحدد المشكلة تافهه ولا لأ هو لو مكنش حاسس ان فى مشكلة مكنش صدَّع نفسه صدقنى محدش غاوى نكد.. محدش بيحكى مشاكله لأى حد و السلام هو اختارك من بين كتير او يمكن مفيش غيرك اصلاً بس الاكيد انك اكتر حد بيرتاحله او بيثق فيه او حتى عنده امل إنك تكون دواه هو اما حكالك كان عارف ان مفتاح سعادته مش فى ايد اى حد تانى غيرك افتحولهم باب الانبساط يا جماعة طبطبوا عليهم من غير معلش تعاطفوا معاهم من غير شفقه جددوا فى طريقة مداوتكم فاجئهم بحاجة بسيطة بيحبوها  حطها الصبح على باب بيتهم اى حاجة بسيطة تعملها.. هتفرق الحاجات الصغيرة بتفرق و بتحسسهم انهم فارقين مع حد  و بتنسيهم الزعل بدل ما يعوزوا جنازه عشان يشبعوا فيها لطم.. خليهم يشبعوا حب و مفاجآت و سعاده

    إنك تحس إنك مميز عند شخص ما.. دا احلى احساس ف الدنيا اما تسمع كلمة حلوة من حد بتحبه لما فرقتك تبقى خسرانة 1-0 و بتلعب ميتينى و تجيب جولين فى الوقت الضايع لما تجيب درجة عالية ف إمتحان مذاكرتلوش الخروجة اللى بتيجى فجأة كباية النسكافية اللى تعدل دماغك بعد صداع رهيب اغنية بتحبها اشتغلت فى الشارع خلتك تبتسم و انت ماشى تعبان هدية بسيطه من صاحبك اللى بقالك شهرين مشفتوش تفكرك إنك على باله لما ترجع البيت و تلاقى اكتر اكله بتحبها جاهزة عشان الام احلى حاجة ف الدنيا لما تذاكر كويس و تقفل الامتحان فتحس إن مجهودك ماراحش ف الهوا لمه صحاب المدرسة اللى ميتعوضوش لما تقع و من غير ما تشتكى تلاقى اللى يسندك لما تلاقى حد مصدقك.. دايماً واقف جمبك و مشجعك كل ما كان سبب السعادة بسيط كل ما كان احلى قصروا وقت الزعل و انبسطوا وحبوا الحياة امسكوا ف اللحظات الحلوة جامد فى اللى بتحبوهم ف اللى بيحبوكوا حافظوا على مصادر السعادة و ادوها فرصة تنموا الحياة مبتحلوش لوحدها.. الحياة حلوة طول ما انت حابب تشوفها كده 

التواضع حلو إنكار الذات جميل حِب نفسك.. حِب نفسك تانى حبتها؟ متذلهاش بقى نفسك غالية.. اعرف قدرها رحم الله إمرئ عرف قدر نفسه.. مش داس على نفسه بقطر

حِب عيوبك و اتعامل معاها اتناقش مع نفسك و اوصل لحل وسط حِب نقط ضعفك لحد ما تتغَلِّب عليها كل نقطة ضعف فيك بتولِّد قوة.

اللى بيصحى يبدأ يومه مكشر من غير سبب اللى مضايق فبيضايق اللى حواليه اللى موده بيقلب فجأة اللى مش لاقى وصف لنفسه غير انه مجنون اللى بيفرح فجأة و بيزعل فجأة اللى عايز يعيط فجأة اللى بيتلكك عشان يفرح  بس بيزعل من اقل حاجة الناس الحساسين اوى و فى نفس الوقت جافين ف مشاعرهم اللى مش عايزهم فى حياته بس عايزهم يهتموا بيه اللى بيغير عليهم بس بيقلهم انه مبيحبهمش اللى بيقلهم انه مش مهتم بس هو مافيش فى دماغه غيرهم المتناقض و عارف كده الصريح اللى بيخبى حاجات كتير الصادق اللى بيتجمل بالكدب اللى لسه مش قادر يفهم نفسه بس هو اكتر حد فاهمها وآخيراً اللى بيقرا الكلام ده و زهق منى او عجبه كلامى الناس دى هتلاقيهم مش مستقرين فى علاقتهم  هتحسهم مهزوزين و مش عارفين ياخدوا قرار بس اما بياخدوا قرارهم مبيرجعوش فيه متهورين... الناس دى مُتعبة جداً بس تعبانة اكتر منهكين نفسياً.. مستهلَكين من كل النواحى حرفياً لكل من يمتلك فى حياته ناس كده.. قلبى معاكم مسؤليتكم كبيرة.. عشان الناس دى عايزة طبطبة من بعيد اهتمام و حب من غير ما تحسسهم انك بتعمل حاجة كن خفيفاً عليهم.. متكونش حِمل.

لما تحب حد اوى متحسسوش انه رقم اتنين متحسسوش باى حاجة غير انه مفيش زيه يا تخليه رقم واحد.. يا تحجزله مكان لوحده انت عارف انه يستاهل حتى لو مايستهلش.. ادام بتحبه متبخلش حِب و ادى على قد ما تقدر عشان لما الانسان بيحس انه مهم عند حد بيديلوا كل حاجة .. كل حاجة ناقصاه..  من غير ما يطلب مجرد الاحساس انه عندك غير.. ده كفيل بإسعادهم،بتحويلهم لملايكة فى حياتك الاهتمام حلو اهتموا باللى بتحبوهم و اللى مبتحبوهومش اعملوا فيهم خير و اهتموا بردو ممكن تكونوا سبب فى تغييرهم فى يوم.

عايزهم ليك لوحدك و انت عمرك ما كنت ليهم لوحدهم انت عارف و انا عارفة و كلهم عارفين انت بتضحك على نفسك انت عمرك ما كنت لحد ولا عمرك هتكون...

الكلام دايماً سهل.. بس مش عن اللى بتحبهمم سيظل اكتر واحد بتحبه هو اكتر واحد مش حاسس انك مديله المكانة اللى يستحقها كل واحد فى حياتنا عنده شخصية بيحس إنها من عالم تانى من كتر ما هى مش موجود زيها او فيها صفات كتير حلوة لدرجة انك بتدور على تصنيف ليهم برا فئة البشر.. انا لسه مكتبتش ف ال بلوج  عن الناس اللى بحبها وزى ما انتِ دايماً بداية اى حاجة فى حياتى فانا قررت إنك تكونى اول حد اكتب عنه.. إليك صديقة كل لحظة حلوة.. صديقة العمر الطويل.. صديقة الطفولة، المدرسة، ثانوية عامة (اصعب مراحل حياتى حتى الان و ربنا ما يعيدها تانى غير و انتِ معايا) صديقة الحياة.. صديقة الاوقات الصعبه و لحظات الضعف و الانكسار و العياط و اليأس.. اللى شايلانى و مستحملة همى و تقلى اللى اما بتكلم معاها بحس انى بتكلم مع نفسى بتديك مساحتك تتكلم براحتك، تعيط، تزعق، تشتمها حتى مش مشكلة كل ده..  اهم حاجة  عندها انك تكون مبسوط..  انتِ الحب و الضحك بصوت عالى و الاخلاق و مركز اسرار الكون اللى مبحسبهاش و انا معاها هتصرف إزاى.. هقول ايه.. اللى عمرى ما فكرت ابرر موقف ليها و لو حتى

الشخصيات الكتومة.. الغامضة،اللى متعرفش تطلَّع منها كلمة صغيرة لو هما مش حابين يحكوا مش هيحسسوك ان فى حاجة هيفضلوا يضحكوا و يتكلموا و يعيشوا اللحظة معاك وهوب فجأة هينهاروا.. هيتوجعوا جامد هما اصلاً موجوعين وعندهم الف سبب و سبب انهم يقعوا بس مبيحبوش ينشروا الطاقة السلبية ع الفاضى لما حالتهم بتسوء.. بيختفوا بيلملموا نفسهم بنفسهم بيحاولوا يقوموا بسرعة قبل ما تاخد بالك ان فى حاجة هزتهم مؤمنين إن الوقت بيداوى و بإن الكلام مش هيجيب فايده مبيحبوش الرغى الكتير ولا العلاج العاطفى للمشاكل اللى هو اللى قدامك يتعاطف معاك و انت بتحكيله مشكلتك هو اه صادق و فعلاً مضايق عشانك بس و بعدين؟ مشكلتك اتحلت؟ ارتحت؟ لأ،انت بس حطيت عليهم حمل زيادة حمل من نوع هما بس اللى فاهمينه عشان هما شخصيات كتومة كل ما زاد عدد العارفين بحالتهم بيزيد توترهم يا ترى هيروح يحكى لمين عن مشكلتى؟ و اللى هيحكيله هيقول ايه عليا؟ اسئلة كتير بتدور فى دماغهم.. الحمل بيزيد مش بيقل الناس دى عايشة اصعب حياة و الله.. لا عارفة تساعد نفسها و لا بتقبل مساعده من حد مرتبطين بصندوقهم الاسود

إلى طنط اللى مش هتبطل تقلى إنت تخنتى.. إلى عمو اللى مش هيبطل يعلَّق على لبسى.. إلى البنى ادمين اللى مبتبطلش تسأل عملتى ايه فى الامتحان؟.. إلى اللى لسه بيسأل صايم ولا زى كل سنه.. إلى كل واحد بيسأل انتِ ليه بتشجعى الزمالك؟ إلى اللى عايز يعرف مالى.. و اللى صعبان عليه إنى اكون زعلانه.. إليكَ و إليكِ.. سيبوا الناس فى حالها متسألوش! بطلوا فضولية.. لو حابين تعرفوا مالهم و خايفين عليهم اوى؟ طبطبوا عليهم من غير ما تعرفوا حاجة.. اكتفوا بفكرة انهم مش كويسين.. هما مش ناقصين هم على همهم،خِفّوا الحِمل ماتَّقِلوهوش.

..كلنا محتاجين نعيد ترتيب اولوياتننا ما بين كل فترة و التانية لازم يكون فى مرحلة هدنه حاجة زى فترة النقاهه كده عشان العلاج يكمل و تقدر تخف و تقوم سليم من بعد المرض ..لازم فترة نقاهه مش شرط تطلع بعدها باى تغيير مش لازم تاخد قرار حاسم او تقطع علاقتك مع دا او دى او انك مثلاً تقرر تسيب شغلك ..او تقرر تدرس حاجة تانية لأ،هو بس بما إننا فى الدنيا دى عايشنها سباق فالواحد بيبقى تعبان م الجرى فى حد ممكن مايستحملش فيقرر ينسحب ..و فى واحد قرر ياخد نفسه و يرجع يكمل .خلينا بس متفقين إن ا لاجازات م العلاقات اكتر حاجة صحية فى العالم تقريباً