الملايكة البنى آدمين..

الكلام دايماً سهل..

بس مش عن اللى بتحبهمم

سيظل اكتر واحد بتحبه هو اكتر واحد مش حاسس انك مديله المكانة اللى يستحقها

كل واحد فى حياتنا عنده شخصية بيحس إنها من عالم تانى

من كتر ما هى مش موجود زيها

او فيها صفات كتير حلوة

لدرجة انك بتدور على تصنيف ليهم برا فئة البشر..

انا لسه مكتبتش ف البلوج عن الناس اللى بحبها

وزى ما انتِ دايماً بداية اى حاجة فى حياتى

فانا قررت إنك تكونى اول حد اكتب عنه..

إليك صديقة كل لحظة حلوة..

صديقة العمر الطويل..

صديقة الطفولة، المدرسة، ثانوية عامة (اصعب مراحل حياتى حتى الان و ربنا ما يعيدها تانى غير و انتِ معايا)

صديقة الحياة..

صديقة الاوقات الصعبه و لحظات الضعف و الانكسار و العياط و اليأس..

اللى شايلانى و مستحملة همى و تقلى

اللى اما بتكلم معاها بحس انى بتكلم مع نفسى

بتديك مساحتك تتكلم براحتك، تعيط، تزعق، تشتمها حتى مش مشكلة كل ده..
 اهم حاجة عندها انك تكون مبسوط.. 

انتِ الحب و الضحك بصوت عالى و الاخلاق و مركز اسرار الكون

اللى مبحسبهاش و انا معاها

هتصرف إزاى.. هقول ايه..

اللى عمرى ما فكرت ابرر موقف ليها

و لو حتى فكرت.. مبحتجش،هى بتقدّر

هى عارفة و فاهمه

صديقة المفاجاْت و تحقيق امنياتى..

انا مبقعش عشان انتِ موجودة

وقت ما انهار و اتعب انتِ بتحسى..

بتهتمى..

مش كلام و خلاص

آمنه مش بتاعة كلام

آمنه بتنفذ

بتخليك مبسوط.. لأ،مبسوط ايه؟

بتخليك اسعد بنى ادم فى الدنيا

مجرد وجودها مخليك مسنود.. حاسس بالآمان

هتوحشينى.. هتوحشينى اكتر ما انت وحشانى

يارب ترجعيلنا بالسلامة

ترجعيلنا و ضحكتك ترن فى ودانا..ترجعلينا آمنه الصافية اللى مش زعلانه من نفسها

آمنه اللى بتحب الحياة قوى..

اللى بتعرف تبسط نفسها بنفسها

اللى بتعمل من اقل حاجة احسن حاجة فى الدنيا

بحبك.. كان نفسى الكلام دا اقلهولك فى وشك

بس كالعاده،خطتى دايماً بتبوظ..

بس نعوضعها

هتوحشينى اوى

بالمناسبة يعنى انا لما دوّرتلك على فئة تانية غير فئة البشر
ملاقتش غير الملايكة.. الملايكة اللى فى صورة بنى آدمين.

.........................................................................................

ده حضن الكترونى علشان مفيش غيره مُتاح.

الكلام كتير.. فمينفعش اتكلم عنك فى بوست واحد

نكمل لما تجيلنا تانى.
يتبع..