عارفة و متأكده 100% انك مش هترجع ولا هتفكر تسأل رغم إنك عارف كويس أنا عامله ايه دلوقتى. اتمنى بس تكون عارف انا لسه ماجتش اطلب اننا نرجع تانى لحد دلوقتى ليه و لو مش عارف فانا مش ناسية إنك اتخليت عنى فى الوقت اللى احتجتك فيه بشده و انك مقدرتش تتنازل عن اى كان اللى منعك عنى وقتها و عنى دلوقتى. واه، انا عارفه بردو إنى ماوحشتكش، لسه سامعاك و انت بتقلهالى لسه سامعاك و انت بتقولى امشى انا مش قادر امسك و مش همسك فيكى خلاص.. سامع نفسك زيي؟
ظروفك لا تسمح بشرحها.. عمرك ما قدرت ولا هتقدر فى يوم تشرحها كلنا بنوصل لعُمق معيَّن جوانا بعديه بتقلب ضلمة.. مش مسموح لحد يولع نور غيرنا فى منا بيسكت و يعانى فى صمت و فى بيطلعه فى شوية زعيق و خناق و نرفزة ملهاش لازمة ظروفك بتضغط عليك،احياناً بتخسرك اغلى ما فى الوجود مع إن مبررك قوى و هيصبرهم كتير.. بس مبيتحكيش محدش بيحب يبان وحش ولا ضعيف بس ساعات بيبقى لازم تستسلم و تقول بأعلى صوت.. انا مش قادر،انا تعبان. بس انت بتختار تسكت و تبرر تبريرات غير مقنعة غير لحد عايزك.. عايز يحافظ عليك فمستنى السبب المش مقنع عشان يقتنع. انا بكتب الكلام دا عشان مليت،مليت لك.. مليت م الاعتذار باسباب غير مقنعة،بكتبه عشان انت متستحقش منى غير الحقيقة.. والحقيقة صعب تتقال،انا بعفيك م المواقف اللى عمرك مابتتحط فيها غير بسببى. مش قادره اجى عليك اكتر من كده.. فهعفيك بينى و بين نفسى على الاقل.
Comments
Post a Comment